អាមេរិកផ្តល់អាវុធជាច្រើនដល់ហ្វីលីពិន ដើម្បីប្រឆាំងការកកើតក្រុម ISIS ក្នុងប្រទេស

ក្រុងម៉ានីល: កាល​ពីថ្ងៃ​ចន្ទ​អាមេរិក បានផ្តល់​អាវុធ​ជាច្រើន​ដល់​ហ្វីលីពីន​ដូចជា​កាំភ្លើង​យន្ត កាំភ្លើងខ្លី​ គ្រាប់​បែកដៃ ដែល​ក្រុម​មេបញ្ជាការ​ទ័ព​ក្នុង​តំបន់​មួយ​បាន​និយាយ​ថា នឹង​ត្រូវគេ​ប្រើប្រាស់ ដើម្បី​ទប់ទល់​ក្រុម​ជន​សកម្មប្រយុទ្ធ​ដែល​កំពុង​ប្រយុទ្ធ​ប្រឆាំង​ជាមួយ​កងកម្លាំង​រដ្ឋាភិបាល​នៅ​ក្នុង​ក្រុង​មួយ​នៅ​ភាគ​ខាងត្បូង។

អាវុធ​រួមទាំង​នោះ មាន​ទាំង​កាំភ្លើង​យន្ត ដែល​មាន​សមត្ថភាព​បាញ់​រាប់ពាន់​គ្រាប់ក្នុង​រយៈពេល​មួយ​នាទី ត្រូវបាន​ប្រគល់​ជូន​នៅឯ​ពិធី​មួយ​ក្នុង​ក្រុង​ម៉ានីល ដែល​បង្ហាញ​អំពី​កម្មវិធី​ជំនួយ​ប្រឆាំង​ភេរវកម្ម​របស់​អាមេរិក​ទៅឲ្យ​រដ្ឋាភិបាល​ហ្វីលីពីន​ក្នុង​រយៈពេល​មួយ​ទសវត្សរ៍​មាន​តម្លៃ​ជា​ទឹកប្រាក់​ប្រហែល ១៥០ លានដុល្លារ​អាមេរិក។

សេចក្តី​ថ្លែងការណ៍​មួយ​របស់​ស្ថានទូត​អាមេរិក បាន​និយាយ​ថា៖ «បរិក្ខារ​យោធា​នេះ នឹង​ជួយ​ធ្វើ​ឲ្យ​ប្រសើរ​ឡើង​នូវ​សមត្ថភាព​ប្រឆាំង​ភេរវកម្ម​របស់​កង​ទាហាន​ជើងទឹក​ហ្វីលីពីន និង​ជួយ​ការពារ​កងកម្លាំង​ទ័ព​ដែល​ចូលរួម​យ៉ាងសកម្ម​ក្នុង​ប្រតិបត្តិ​ការប្រឆាំង​ភេរវកម្ម​នៅ​ក្នុង​ហ្វីលីពីន​ភាគ​ខាងត្បូង»។

ប្រមុខ​ទ័ព​ជើងទឹក​ហ្វីលីពីន​លោក​ឧត្តម​សេនីយ៍​ឯក Emmanuel Salamat បាន​ថ្លែង​នៅឯ​ពិធី​នោះ​ថា កងទ័ព​ត្រូវ​ប្រើប្រាស់​អាវុធ​ទាំងអស់​នេះ​នៅ​ក្នុងការ​ប្រយុទ្ធ​ប្រឆាំង​ដែល​កំពុង​តែបន្ត​ប្រឆាំង​នឹង​ក្រុម​ជន​សកម្មប្រយុទ្ធ​អ៊ិស្លាម​និយម​នៅក្នុង​ក្រុង​ម៉ារ៉ាវី​ភាគ​ខាងត្បូង។

ក្រុមជន​សកម្មប្រយុទ្ធ​កាន់​ទង់ជាតិ​ក្រុម​រដ្ឋ​អ៊ីស្លាម (IS) ពណ៌​ខ្មៅ បាន​សម្រុក​ចូល​បង្ក​ការបំផ្លិច​បំផ្លាញ​ក្រុង​ម៉ារ៉ាវី​កាលពី​ជិតពីរ​សប្តាហ៍​កន្លងទៅ​បង្កឲ្យ​មានការ​ប៉ះទង្គិច​គ្នា​ជាមួយ​កងទ័ព​រដ្ឋាភិបាល និង​ក្រុម​កម្លាំង​ប៉ូលិស បាន​បង្កឲ្យ​មនុស្ស​យ៉ាងតិច ១៧៨ នាក់​ស្លាប់​បាត់បង់​ជីវិត។

ជាការ​ឆ្លើយតប​អំពើហិង្សា​នោះ លោក​ប្រធានាធិបតី Rodrigo Duterte បាន​ប្រកាស​ច្បាប់​អាជ្ញាសឹក​នៅ​តំបន់​នោះ៕